Ministria për Evropën dhe Punët e Jashtme

Ministrja për Evropën dhe Punët e Jashtme, Olta Xhaçka, mori pjesë në takimin katërlateral që u mbajt në Brindizi për Korridorin VIII, së bashku me Ministrin e Jashtëm të Italisë, Antonio Tajani, Ministrin e Jashtëm të Maqedonisë së Veriut, Bujar Osmani dhe Ministren e Jashtme të Bullgarisë, Maria Gabriel.

Gjatë konferencës së përbashkët për shtyp që u mbajt pas takimit, Ministrja Xhaçka theksoi se Korridori VIII është shumë më tepër se një projekt i thjeshtë infrastrukturor, pasi është parashikuar si një mekanizëm bashkëpunimi dhe integrimi që do të transformojë gjendjen ekonomike të vendeve të përfshira.

“Investime të këtij lloji janë thelbësore për ta bërë perspektivën e BE-së të prekshme për qytetarët tanë. Shqipëria kryeson këtë vit Procesin e Berlinit dhe ne synojmë të bëjmë forcimin e ndihmës financiare të BE-së për Ballkanin Perëndimor dhe Korridorin VIII një nga temat kryesore të Samitit. Fokusi i Procesit të Berlinit duhet të jetë arritja e përputhshmërisë ekonomike me standardet e BE-së. Kjo është thelbësore për stabilitetin dhe qëndrueshmërinë e rajonit tonë në këtë periudhë të trazuar për sigurinë evropiane dhe globale. Korridori VIII është një korridor që do të na bashkojë, do të jetë edhe një korridor sigurie. Ne të gjithë e mbështesim dhe do të punojmë bashkarisht për ta avancuar atë sa më shpejt”, u shpreh ajo.

Korridori VIII Pan-Evropian përbën një nga projektet prioritare për të katër vendet e përfshira, Shqipërinë, Italinë, Bullgarinë dhe Maqedoninë e Veriut dhe përfshirja e tij në rrjetin evropian të transportit ka qenë një nga synimet kryesore të qeverive respektive. Ndërtimi i tij do të bëje të mundur lidhjet rajonale, fqinjësinë e mirë, zhvillimin ekonomik, udhëtimin e shpejtë për njerëzit, bizneset dhe mallrat. Korridori 8 vlerësohet si një projekt i rëndësisë strategjike edhe për BE-në dhe NATO-n.