Përfaqësuesit nga Komisioni Evropian dhe Shqipëria u takuan në Bruksel për të diskutuar nivelin e zbatimit të MSA-së dhe përafrimin e legjislacionit të vendit me atë të BE-së në fushën e bujqësisë dhe peshkimit, përfshirë sigurinë ushqimore, veterinare dhe çështjet fitosanitare. Takimi u kryesua për BE-në nga Znj. Ingrid Jenezova nga Drejtoria e Përgjithshme për Fqinjësinë dhe Negociatat e Zgjerimit të Komisionit Evropian, dhe për Shqipërinë nga Z. Sokol Dedja, Zëvendës Ministër për Evropën dhe Punët e Jashtme.

Sa i përket bilancit tregtar dypalësh të produkteve bujqësore dhe peshkimit, Komisioni vuri në dukje rritjen e eksporteve nga të dy palët gjatë vitit të kaluar, ndërsa tregtia me produkte bujqësore të përpunuara u ul në vitin 2018.

Komisioni përshëndeti përpjekjet e autoriteteve shqiptare në zbatimin e Instrumentit për Ndihmë Para-anëtarësimit për Zhvillimin Rural (IPARD – programi i zhvillimit rural të financuar nga BE), dhe theksoi nevojën për të shpejtuar proceset që lidhen me qëndrueshmërinë ekonomike të projekteve, ndërtimi i kapaciteteve të shërbimeve këshilluese për të ndihmuar përfituesit e mundshëm, forcimin e mëtejshëm të kapaciteteve të Autoritetit Menaxhues dhe Agjencisë së IPARD, dhe vazhdojnë të sigurojnë zbatimin e tij në një mënyrë transparente.

Komisioni e ftoi Shqipërinë të kompletojë dhe të bëjë plotësisht funksionale regjistrimin e kafshëve dhe të krijojë regjistrin e fermerëve. Të dy regjistrat janë të nevojshëm për zbatimin efikas të IPARD, si dhe për kërkesat e përcaktuara në kuadrin legjislativ të politikës veterinare. Shqipëria duhet të sigurojë afatin kohor të plotësimit të këtyre regjistrave në vitin 2020. Për më tepër, Komisioni e ftoi Shqipërinë të vazhdojë të punojë për konsolidimin e tokës – përfshirë krijimin e një kadastre – të cilat janë thelbësore për zbatimin e disa aspekteve të rëndësishme të Politikës së Përbashkët Bujqësore (CAP) . Në këtë kontekst, Komisioni theksoi rëndësinë e fillimit të punës përgatitore për Regjistrimin e ardhshëm të Pronave Bujqësore (CAH).

Komisioni inkurajoi Shqipërinë të përgatisë një politikë kombëtare për sigurinë e ushqimit dhe planin e zbatimit të përafruar me standardet e BE-së, dhe të sigurojë një kapacitet të mjaftueshëm administrativ, i cili është thelbësor për të lejuar një zbatim të saktë dhe të harmonizuar, si dhe për të siguruar gjurmimin e plotë përgjatë gjithë zinxhirit ushqimor.

Në sektorin e peshkimit, Komisioni ftoi Shqipërinë të vazhdojë zbatimin e rekomandimeve të Komisionit të Përgjithshëm të Peshkimit për Mesdheun (GFCM) dhe të riaktivizojë Sistemin e Monitorimit të Anijeve (VMS), i cili nuk ka funksionuar që nga Marsi 2017. Gjithashtu u soll dhe një herë në vëmendje përmirësimi i kapaciteteve administrative në sektorin e peshkimit.