Ministria për Evropën dhe Punët e Jashtme

MARRËDHËNIET DYPALËSHE SHQIPËRI NORVEGJI

Norvegjia ndodhet në Evropën Veriore – ndan kufirin me Suedinë, Finlandën dhe Rusinë në veri-lindje, dhe në anën perendimore ka një vijë bregdetare të gjerë në Oqeanin Atlantik të Veriut dhe Deti Barents në veri. Popullsia është afërsisht 5.3 milion, mbi 1 milion prej të cilëve jetojnë në dhe përreth kryeqytetit, Oslo.

Sistemi politik i Norvegjisë është një demokraci parlamentare përfaqësuese me një monarki kushtetuese. Edhe pse jo anëtare e BE-së, Norvegjia është pjesë e Zonës Ekonomike Evropiane dhe anëtare e NATO-s.

PËRMBLEDHJE

Marrëdhëniet diplomatike midis Shqipërisë dhe Norvegjisë u (ri) vendosën 29 maj 1971. Mbulimi diplomatik i Norvegjisë realizohet nga Ambasada e RSH në Stokholm, ndërsa Norvegjia i mbulon marrëdhëniet me Shqipërinë nga Ambasada e saj ne Prishtinë.

MARRËDHËNIET DYPALËSHE

Vizita e parë e një ministri norvegjez të Punëve të Jashtme në Shqipëri është zhvilluar në prill të vitit 1998, kur z. Knut Vollebæk vizitoi vendin tonë për të diskutuar jo vetëm çështjet dypalëshe por edhe ato rajonale, veçanërisht Kosovën (atë periudhë Norvegjia bënte pjesë në Trojkën e OSBE-së). Në vitet 1990-të Norvegjia filloi financimin e disa projekteve, ndër të cilët më i rëndësishmi ishte ai për modernzimin e Telekomit shqiptar.

Dialogu politik konsiderohet si një nga shtyllat kryesore të marrëdhënieve bilaterale.Vizitat e fundit të nivelit të lartë të realizuara janë: vizita e ish Ministrit për Punët e Jashtme, Ditmir Bushati, në korrik 2015 në Norvegji dhe vizita e ish Ministrit për Punët e Jashtme, Børge Brende në mars 2016 në Tiranë. Norvegjia nuk është anëtare e BE, por bën pjesë në NATO, Hapësirën Ekonomike Evropiane dhe në Zonën Schengen. Oslo mbetet mjaft e interesuar në çështjet e sigurisë në përgjithësi, përfshirë stabilitetin në Ballkanin Perëndimor.Në këtë kontekst, Norvegjia ka mbështetur anëtarësimin e Shqipërisë në NATO dhe procesin e integrimit europian të Shqipërisë duke ofruar ndihmë konkrete.