[metaslider id=13669]

U prezantua sot nisja e një bashkëpunimi të ri mes Shqipërisë dhe Bashkimit Europian në fushën e sigurisë ushqimore.“Mbështetja për sigurinë ushqimore, veterinarinë dhe standardet fitosanitare”. Ky është programi me vlerë rreth 5 milionë euro që do të implementohet për një periudhë 4-vjeçare. Autoriteti i Sigurisë Ushqimore në Irlandë dhe homologët finlandezë do të asistojnë qeverinë shqiptare për të zbatuar politika dhe për të ndërmarrë veprime konkrete duke u mbështetur në objektivat tona kombëtare, si dhe në Politikën e Bashkimit Europian mbi Ushqimin e Sigurt.

Një element që e dallon këtë projekt është veçanërisht përfshirja e konsumatorit në përpjekjen për të rritur sigurinë në zinxhirin ushqimor. Në takimin dhe konferencën për media që u mbajt sot ishte i pranishëm Ambasadori i BE-së në Shqipëri, z.Luigi Soreca, ministri i Bujqësisë dhe Zhvillimit Rural, z.Bledi Çuçi dhe zyrtarë të tjerë europianë. Gjatë fjalës së tij ministri Çuçi foli për riformatim të Autoritetit Kombëtar të Ushqimit. Sipas tij, përmes partneritetit të ri me BE-në, AKU-ja do të shndërrohet në një institucion që do të funksionojë si Njësi Inteligjente. (Intelligence Unit)

“Ne si Ministri e Bujqësisë dhe qeveria në tërësi, jemi të vendosur të krijojmë struktura të konsoliduara që mbulojnë çështjet që lidhen me ushqimin e sigurt, veterinarinë dhe mbrojtjen e bimëve. Kemi gjithashtu gatishmërinë që në mënyrë graduale të integrojmë legjislacionin shqiptar me rregulloret e Bashkimit Europian. Po punojmë për një ligj të ri të Shërbimit Veterinar.  Organizimi i ri që do t’i bëjmë këtij shërbimi synon ta kthejë në funskional dhe operacional, si në stukturat e komandës vertikale ashtu dhe të asaj horizontale. Përmes ligjit të ri dhe zbatimit të këtij projekti unë besoj se do të kemi në fund një shërbim veterinar më të mirë në çdo zonë të vendit”, tha ministri Çuçi.

Gjurmueshmëria e plotë e të gjitha hallkave të zinxhirit ushqimor është detyrë prioritare të Ministrisë së Bujqësisë dhe institucioneve në varësi të saj, ku fokusi më i madh është AKU-ja dhe Shërbimi Veterinar. Sa i përket gjurmueshmërisë së zinxhirit ushqimor do të synojmë të ndjekim të njëjtën qasje që aplikojnë edhe vendet e BE-së nën moton ‘Nga ferma në tryezë’.{:}