Ministria e Arsimit dhe Sportit dhe Fondacioni Shqiptaro-Amerikan për Zhvillim (AADF) nënshkruan një Memorandum e Mirëkuptimi për zbatimin e projektit “Inteligjenca Artificiale për të rinjtë” (Intel® AI for Youth).

Programi i Inteligjencës Artificiale i cili po zbatohet në më shumë se 11 vende në mbarë botën, do të nisë pilotimin edhe në Shqipëri, me synimin që të përfshihet në të gjitha shkollat e mesme. Teknologjitë në zhvillim si AI po ndryshojnë dhe po riformojnë botën duke pasur ndikim të jashtëzakonshëm në sektorin e punësimit dhe të ekonomisë, ndaj dhe ky projekt ka për qëllim të rrisë aftësitë që lidhen me teknologjinë dhe inteligjencën artificiale tek nxënësit shqiptarë, të moshës nga 13 deri 19 vjeç.

Në fjalën e saj Ministrja e Arsimit dhe Sportit znj. Evis Kushi shprehu mirënjohjen për Fondacionin Shqiptaro-Amerikan për Zhvillim për bashkëpunimin e ngushtë dhe kontributin e rëndësishëm që jep në fushën e arsimit në Shqipëri.

Kryetari i Bordit të Drejtorëve të AADF, z. Michael Granoff u shpreh se nëpërmjet këtij programi do t’u japim mundësi të rinjve shqiptar për të mësuar teknologjinë e Inteligjencës Artificiale përmes një kurrikule të ndërtuar nga Intel® Corporation, e cila është një ndër kompanitë më të mëdha të teknologjisë në botë.

Pilotimi i programit do të fillojë në vitin shkollor 2022-2023 në pesë institucione publike, ku do të krijohen grupe që do të zhvillojnë orët për Inteligjencën Artificiale, pas orarit mësimor, si veprimtari jashtëshkollore pranë institucionit arsimor të përzgjedhur. Gjithashtu do të ketë dhe dy grupe private jashtë shkollave.

Gjatë kësaj faze pilotimi nga kurrikula e projektit parashikohet të përfitojnë 140 nxënës, ndërkohë që do të realizojë mbi 160 orë trajnimi për mësuesit dhe certifikimin e tyre.

Në grupet jashtëshkollore private do të zhvillohet një kurrikul më e avancuar, ku nxënësit do të kenë mundësi të trajnohen në një afat 6 deri në 8 muaj, ndërkohë që në institucionet publike projekti do të zhvillohet në një kohë prej 1 deri në 2 vjet.

Të gjitha kostot financiare që lidhen me ndërtimin e laboratorëve të Inteligjencës Artificiale për nxënësit, për trajnimin e mësuesve dhe për pagesën e mësuesve që do të bëhen pjesë e projektit do të mbulohen nga AADF.

https://fb.watch/d4CezEZwnk/