Kongresi Për Arsimin mblodhi në Tiranë në Pallatin e Kongreseve ministra, akademikë, rektorë nga hapësira shqiptare dhe të huaj, si dhe agjenci, partnerë në nivel kombëtar dhe ndërkombëtarë, përfaqësues të shoqërisë civile dhe donatorë të projekteve në fushën e arsimit, etj.

Kongresi i arsimit i cili do të jetë në datat 12 dhe 13 shtator, përqendrohet në “sfidat e arsimit cilësor dhe gjithëpërfshirës drejt integrimit evropian” dhe ka për qëllim të bashkojë në një hapësirë diskutimi shumë aktorë në fushën e arsimit, përfshirë arsimin parauniversitar, arsimin e lartë dhe kërkimin shkencor. Pjesëmarrja në këtë kongres, e shumë autoriteteve të institucioneve arsimore, rektorëve, akademikëve, pedagogëve, studiuesve, politikëbërësve nxit bashkëpunimin e ndërsjella për sfidat e të ardhmes, për një arsim cilësor dhe gjithëpërfshirës drejt integrimit evropian.

Të pranishëm në hapjen e këtij kongresi ishin kryeministri i Shqipërisë Edi Rama, Ministrja e Arsimit dhe Sportit Evis Kushi, anëtarë të kabinetit qeveritar, pedagogë, mësues, etj.

 

https://www.facebook.com/kushievis/videos/579241467229795

 

FJALA E PLOTË E MINISTRES EVIS KUSHI

 

I nderuar Kryeministër,

Anëtarë të kabinetit qeveritar,

Pedagogë, mësues,

Miq e të ftuar,

 

Ju falënderoj të gjithëve që jemi mbledhur së bashku për këtë kongres, Kongresi i Arsimit, i cili përkon edhe me fillimin e vitit të ri shkollor. E me këtë rast, dua ta nis me një urim të përzemërt për te gjithë nxënësit dhe mësuesit, në të gjithë vendin, për një vit shkollor të mbarë e të suksesshëm!

 

Arsimi, përveçse është një e drejtë themelore për çdo njeri, është edhe faktori kryesor për zhvillimin e qëndrueshëm ekonomik e shoqëror të çdo kombi. Ndryshimet që po ndodhin sot në botë:

Nga njëra anë, fatkeqësitë natyrore, pandemi, luftëra, kriza ekonomike, ndryshimet klimatike;

E nga ana tjetër, zhvillimet e teknologjisë, digjitalizimi, e nevojat e tregut të punës për profesione të reja, sjellin nevojën për një vizion të ri arsimor. E prandaj edhe Samiti Global i Arsimit, që do të zhvillohet pas pak ditësh në New York, ka zgjedhur pikërisht këtë temë “Transformimi i Arsimit”. Si përgjigje e një krize globale në arsim, krizë cilësie, krizë pabarazie dhe gjithëpërfshirjeje.

 

Nuk ka asnjë dyshim që për arsimin, në çdo kohë e në çdo vend, duhet një angazhim dhe solidaritet i madh kombëtar, por veçanërisht në kohë sfidash e transformimesh, arsimi duhet të jetë në krye të çdo axhende dhe të harmonizojë politikat me veprimet, për t’u rimëkëmbur në këtë botë që ndryshon me ritme shumë të shpejta.

 

E në këtë frymë, edhe qëllimi i këtij kongresi është të bëjë bashkë shumë aktore në fushën e arsimit, përfshirë arsimin parauniversitar, arsimin profesional, arsimin e lartë, kërkimin shkencor, partneret në nivel kombëtar e ndërkombëtar, pedagogë, mësues, studiues e politikëbërës, për të nxitur bashkëpunimin për sfidat e të ardhmes, për një arsim cilësor, të barabartë e gjithëpërfshirës, drejt BE.

 

Por, përveç krizës globale, ne këtu në Shqipëri, po përballemi edhe me një sfide tjetër, një tendencë me të cilën në fakt po përballet i gjithë rajoni ynë ballkanik. Një pjesë e të rinjve largohen nga rajoni, për studime apo për punësim, drejt vendeve perëndimore, si Gjermania por jo vetëm, vende të cilat, duke qenë drejt plakjes së popullsisë, e duke patur nevoja në rritje në tregun e punës, kanë hapur dyert për të rinjtë tanë, veçanërisht për mjekët, infermierët, por edhe profesione të tjera të kohës.

 

Për t’iu përgjigjur kësaj tendence, ne kemi hartuar disa politika të reja, siç është:

–              ndërkombëtarizimi i universiteteve, si dhe financim shtesë, për programe studimi të përbashkëta e të dyfishta me universitete prestigjioze në BE, por edhe për struktura ekselence evropiane, që mund të jenë departamente, fakultete, qendra kërkimore. Qëllimi ynë është për të rritur cilësinë, dhe për t’i dhënë më shumë vlerë diplomave tona, njësoj si në universitetet më të mira të BE;

 

–              po ashtu, një tjetër politike është edhe përcaktimi i programeve të studimit prioritete për zhvillimin e vendit, si dhe bursa studimi më të lartat ndonjëherë për këto programe, siç janë bujqësia, mësuesia, shërbimet, turizmi, me kushtin që studentët pas diplomimit të vazhdojnë të qëndrojnë këtu, në Shqipëri, të japin kontribut për vendin e për njerëzit tanë;

 

Por a mjaftojnë këto politika? Natyrisht që në arsim, ndryshe nga sektorët e tjerë, të gjithë ekspertët bien dakord që, politikat dhe reformat, sa më të mëdha e të thella të jenë, aq më shumë kohë kërkojnë për t’u zbatuar e vlerësuar, sepse edhe rezultatet nuk janë as të menjëhershme, e as lehtësisht të matshme.

 

Ndaj, unë besoj që në panelet e këtij kongresi, sot dhe nesër, kjo temë do të ketë diskutim të gjerë, dhe ju do të na jepni opinione e sugjerime me vlerë, që me pas, ne të mund t’i integrojmë me politikat dhe veprimet tona.

 

E ndërkohë kërkimi shkencor. Sfidat që përmenda që në hyrje të fjalës sime, e bëjnë te domosdoshme ngritjen e tij në një nivel te ri. Pa dyshim që duhen më shumë financime, më shumë mbështetje, por mbi të gjitha duhet një qasje e re.

 

Deri më sot, universitetet janë aktorët më të rëndësishëm në këtë proces, me projektet e tyre kërkimore, me pjesëmarrjen në programet ndërkombëtare, bashkëpunime, shkëmbime dhe partneritete me institucione të huaja, ku për hir të së vërtetës, ka rezultate shumë të mira. Në këtë drejtim, ne i kemi të gjitha mundësitë që të bëhemi shembull pozitiv edhe në rajon, për thithjen e fondeve nga BE për arsimin dhe kërkimin shkencor. Nëse i referohemi vetëm Programit Horizont Evropa, universitetet tona e kanë rritur performancën, dhe tashmë jo vetëm që përfitojnë më shumë financim, por janë edhe lider kryesor në projekte të ndryshme.

 

Megjithatë, edhe këtu besoj se duhet bërë shumë më tepër. Ka ardhur koha që vetë bizneset të jenë më të përfshira, me aktive, madje pse jo edhe katalizator i këtij procesi, duke bashkëvepruar ngushtë me institucionet e arsimit të lartë.

 

Në këtë kongres, kemi dedikuar panele të posaçme edhe për kërkimin shkencor, ku kemi ftuar, veç universiteteve dhe qendrave kërkimore, edhe përfaqësues të biznesit e dhomave të tregtisë, dhe mirëpresim më shumë interes kontributin e tyre, me propozime dhe angazhime konkrete.

 

Të nderuar pjesëmarrës,

Edhe në sistemin arsimor parauniversitar sfidat janë të mëdha, për të arritur që nxënësit tanë të përfitojnë aftësitë e reja të shekullit 21, të bëhen profesionistë të mirë, punonjës të suksesshëm dhe qytetarë të denjë të së ardhmes.

 

Kemi investuar në infrastrukturën shkollore, kemi përmirësuar kurrikulat, tekstet shkollore, trajnimin e mësuesve, mirëqenien psiko-sociale te nxënësve, mbështetjen për nxënësit me aftësi ndryshe.

 

Por kryefjalë në politikat tona, dhe fokusin më të veçantë, jam e bindur që duhet ta ketë pa diskutim digjitalizimi. Sepse është pikërisht transformimi digjital i arsimit që zbut pabarazinë, dhe nxit gjithëpërfshirjen në arsim. Falë digjitalizimit dhe sistemeve të reja online, ne garantojmë dhe lehtësojmë regjistrimin e nxënësve, ndërveprimin shkolle-prindër, meritokraci dhe transparencë për regjistrimin e studentëve në universitete, por edhe punësimin e mësuesve.

 

Nga ana tjetër, studimet me te fundit i kushtojnë rendësi te veçantë edukimit ne fëmijërinë e hershme. Ato tregojnë që nëse kemi programe cilësore për këtë grup moshë, atëherë nga çdo dollar i investuar, përfitimet me vone janë 10 herë më të larta, ose e thënë ndryshe kursimet në periudhën afatgjatë janë vërtetë të konsiderueshme.

 

Prandaj shpresoj që gjatë këtyre dy ditëve në këtë kongres të kemi diskutime produktive edhe për këtë aspekt të edukimit.

 

 

Të nderuar pjesëmarrës,

Në një kohë të shkurtër është e pamundur të ndalem në çdo problematike apo politikë tonën arsimore, sepse në fakt do të jenë pikërisht panelet e këtij kongresi, me tematika specifike, që do të na ndihmojnë ta vendosim arsimin në krye të agjendës sonë politike.

 

Në mbyllje të fjalës sime, kam kënaqësinë të ftoj këtu 3 të rinj. Ata do ta prezantojnë vetë, nga vijnë, dhe kanë me siguri edhe mesazhe të rëndësishme, jo vetëm për ne, por edhe bashkëmoshatarët e tyre.

 

Arsyeja pse ata janë këtu është sepse të rinjtë duhet të kenë një zë ne vendimmarrje. Ne duhet të përpiqemi jo vetëm që të përmirësojmë arsimin për të rinjtë, por ne duhet ta përmirësojmë arsimin bashkë me të rinjtë.

 

Prandaj, duke ju falënderuar edhe një herë të gjithëve për pjesëmarrjen dhe kontributin, veçanërisht ata që kanë ardhur nga vende të tjera posaçërisht për këtë event, pres me padurim të dëgjojmë së bashku Alemin, Klaudian dhe Enkelën.

 

Suksese të gjithëve!